INSP-TL

Enkontru koordenasaun servisu kontinuasaun entre INSP-TL, WHO no UNDP kona-ba konstrusaun FETP Resource Center realiza iha sala Enkontru DGs, INSP-TL.

Iha inisiu enkontru, Diretor Geral Tekniku Sientífiku INSP-TL, Gregorio Rangel, M.Sc., hato’o benvindu ba ekipa WHO, UNDP NO Dirigente sira husi INSP-TL ne’ebé disponibiliza tempu atu marka prezensa iha enkontru loron ne’e.

Durante enkontru, parte tolu halo diskusaun kona-ba preparasaun ba konstrusaun FETP Resource Center iha INSP-TL. Husi parte WHO, Dr. Seugman Cha hanesan project manager hato’o katak WHO ho UNDP iha ona asina akordu ida ne’ebé permite UNDP atu kontinua preparasaun ba konstrusaun FETP liu husi faze daruak. Faze dahuluk mak faze insepsaun, ne’ebé inklui revizaun ba BIOQ no DED, pedidu autorizasaun ba konstrusaun husi UNDP ba Ministério Obras Públicas, teste rai ba fatin konstrusaun, no revizaun teknika sira seluk ne’ebé relasiona ho projetu ne’e.

Husi parte UNDP, Sr. Germano da Costa Boavida hato’o katak UNDP ho WHO iha ona akordu formal entre UN agencies hodi halo preparasaun ba konstrusaun FETP Resource Center iha INSP-TL. UNDP mos planeia atu rekruta konsultan profesional ida hodi halo revizaun ba dezenhu ne’ebé iha ona.

Aleinde ne’e, UNDP prepara ona karta pedidu ba Ministério Obras Públicas hodi realiza teste rai, no mos submete pedidu lisensa ba Autoridade Nacional Licensa Ambiental (ANLA) atu halo avaliasaun ambientál molok implementa konstrusaun. Ekipa UNDP sei aprezenta fila fali rezultadu preliminariu ba INSP-TL iha fulan Jullu ka Agostu tinan ida ne’e. Hafoin enkontru, ekipa UNDP ho WHO tun ba terenu hodi observa fatin hodi halo konstrusaun wainhira estudu viabilidade remata.

Enkontru ne’e konta ho prezensa husi Diretor Geral Tekniku Sientífiku, Project Manager husi WHO, reprezentante UNDP, Diretor Nacional Formasaun, Diretora Nacional Administrasaun Geral, ekipa enjenaria husi UNDP no INSP-TL, no ekipa tekniku sira seluk.