INSP-TL

Dili, 05 Maiu 2026 . Diretor Geral Tékniku Sientífiku INSP-TL, Gregorio Rangel, M.Sc., sai hanesan oradór hodi ko’alia kona-ba papel no funsaun INSP-TL ba dirigente no membru Assosiasaun Parteira Timor-Leste (APTL) hodi fortalese kompetensia parteira liu husi formasaun, supervizaun no governasaun peskiza atu garantia kualidade servisu saude materna no neonatal iha Timor-Leste.

Iha ninia intervensaun, Diretor Geral hatete katak papel importante INSP-TL nian mak bazeia ba área prinsipál haat (4), tuir Dekretu-Lei Nú. 84/2022, loron 23 Novembru, mak hanesan: formasaun, peskiza, saúde públika no referénsia laboratoriu. Nia mos husu ba profesionais parteira sira atu hala’o servisu tuir termu referénsia ne’ebé lideransa sira estabelese no kumpri orientasaun sira ne’ebé jerente sira fó, atu garante servisu saúde ne’ebé di’ak no efisiente.

Nia hatutan tan katak APTL hanesan parseiru governo hodi servisu hamutuk lori saude ba inan no oan sira iha Timor-Leste liu-liu ba sira ne’ebe difisil hodi asesu ba fasilidade saude sira hanesan iha area remotas, parteira halao knaar hodi hatan ba nesesidade populasaun sira iha baze.

Iha parte seluk, Diretor Geral esplika katak servisu INSP-TL sira interligadu malu, inklui formasaun, peskiza, saúde públika no referénsia laboratoriu, ne’ebé presiza hetan akompanhamentu husi unidade kontrolu kualidade atu asegura implementasaun atividade sira tuir padraun ne’ebé estabelese, liu-liu iha área formasaun no area relevante sira seluk. INSP-TL Konsege forma ona parteira sira hamutuk 709 husi tinan 2017-2025. Husi Numeru ne'e maioria kompetent ona halao servisu hanesan partus mos no seguru, Essential New Born Care, Planeamentu Familar, Emoch, Vilensia bazeia ba Generu no sira seluk.

Kona-ba peskiza, nia hatete katak presiza halo akompanhamentu rigorozu atu garante implementasaun peskiza tuir proposta ne’ebé aprova ona. Iha área vigilánsia epidemiolojia, INSP-TL hala’o knaar importante hodi responde ba surtu moras sira iha Timor-Leste, liu-liu ho investigasaun, análize profunda no fornese rekomendasaun ba Ministériu da Saúde atu foti medida urjente. Ho ida ne'e parteira balun partisipa hanesan ko-investigador ba peskiza sira ne'ebe apoiu fundu husi Universidade Gadja Mada Indonesia.

Iha sorin seluk, referénsia laboratoriu, INSP-TL mos fó atendimentu ba amostra kliniku sira ne’ebé refere husi nivel munisipiu ba nivel nasionál, hodi halo deteksaun no fó rezultadu ne’ebé sai baze importante ba tratamentu saúde.

Aprezentasaun remata ho sesaun pergunta no resposta entre oradór no partisipante sira, ne’ebé permite diskusaun interativu no klarifikasaun kona-ba asuntu sira ne’ebé aprezenta