INSP-TL

Ministru Saúde em Ezersísiu no atual Vise-Ministru ba Fortalesimentu Institusionál Saúde (VMFIS), Sr. José dos Reis Magno, Lic.SP, MM, oficialmenti halo inaugurasaun ba muru protesaun hale’u Sentru Saúde Internamentu Ainaro/Hospital Ainaro, iha área Maulo-Builico, Munisípiu Ainaro.

Iha nia diskursu, Ministru Saúde em Ezersísiu hatete katak nia sente onra boot no haksolok atu marka prezensa iha serimónia importante ida-ne’e, hodi hamutuk inaugura oficialmente projetu konstrusaun muru hale’u ba Sentru Saúde Internamentu Ainaro.

Nia mós hato’o agradeseimentu, lori naran Ministériu Saúde no IX Governu Konstitusionál, ba parte hotu ne’ebé kontribui ba realizasaun projetu ida-ne’e, liuliu ba kompanhia Reza Unipessoal, Lda., autoridade lokal sira, ekipa téknika, no komunidade sira ne’ebé fó apoiu durante implementasaun obra.

Projetu konstrusaun ne’e finansia husi Orsamentu Geral Estadu (OGE) ho montante total US$ 135.114,78. Implementasaun hahú iha loron 2 Maiu 2025 no remata tuir planu iha fulan Marsu 2026.

Ministru Saúde em Ezersísiu esplika katak muru ne’ebé inaugura la’ós de’it estrutura físika ida, maibé reprezenta seguransa, dignidade no responsabilidade Governu nian atu proteje infraestrutura saúde, profisionál saúde sira no komunidade ne’ebé asesu ba servisu saúde iha fatin ne’e.

Objetivu husi konstrusaun muru ida-ne’e maka atu:

Proteje fasilidade saúde;

Hametin seguransa ba dadus pasiente sira;

Proteje ekipamentu saúde, medikamentu no materiais médiku sira seluk;

No garante asesu ba kuidadu saúde ne’ebé seguru, dignu no ho kualidade.

Hanesan reprezentante husi INSP-TL, Diretor Geral Tékniku no Sientífiku no Diretor Geral Laboratóriu Saúde partisipa iha serimónia inaugurasaun ida-ne’e hamutuk ho Prezidente Autoridade Munisípiu Ainaro, dirijente Ministériu Saúde sira, pesoál saúde, membru PNTL, komunidade no entidades relevantes seluk