INSP-TL

Manatuto, dia 15 de Maio 2026. Diretor Nasional Rekursu Humanus husi INSPTL, Sr. Raimundo da C. Neves, MPH ofisialmente taka atividade formasaun kona-ba imunizasaun iha Pratika –IIP ne’ebé realiza ba profisionál saúde sira iha Municipiu Manatuto, hanesan parte husi esforsu institusionál hodi hasa’e kapasidade rekursu umanu iha setor saúde.

Formasaun ida-ne’e nia objetivu mak atu reforsa koñesimentu no abilidade tékniku profisionál saúde sira kona-ba programa imunizasaun, jestaun vaksina, prosedimentu administrasaun, manutensaun cold chain ka korente malirin, no monitorizasaun atu asegura servisu imunizasaun ne’ebé seguru, efetivu no ho kualidade ba komunidade.

Iha nia diskursu taka formasaun nian, Diretor Nasional Rekursu Humanus haktuir katak imunizasaun mak ida husi estratéjia importante tebes iha prevensaun moras no protesaun saúde públika, liu-liu ba inan-aman, labarik no komunidade tomak.

Nia mos enfatiza katak investimentu ba dezenvolvimentu rekursu umanu sei sai base forte ida atu hametin sistema saúde nasional no hasa’e kualidade atendimentu saúde iha território Timor Laran tomak.

“Liu husi formasaun ida-ne’e, hau hein katak profisionál saúde sira bele aplika koñesimentu no esperiénsia ne’ebé hetan ona ho responsabilidade no kompromisu aas, hodi asegura katak programa imunizasaun lao ho di’ak no to’o ba komunidade sira ne’ebé presiza ho diak no kualidade,” hateten Diretor Nasional.

Iha serimónia enserramentu atividade formasaun ne’e, marka prezensa mós husi Diretor Saúde Municipiu Manatuto Sr. Arfim Perreira Carceres,Lic.SP,M.SP, ne’ebé hato’o apresiasaun aas ba INSPTL tanba kontinua fó apoiu tékniku no kapasidade ba profisionál saúde sira iha munisípiu.

Nia iha nia intervensaun haktuir katak formasaun kona-ba imunizasaun ida-ne’e importante tebes atu hasa’e kompeténsia profisionál saúde sira, nune’e bele garante implementasaun programa imunizasaun ne’ebé efetivu, seguru no ho kualidade ba komunidade iha Municipiu Manatuto.

Prezensa lideransa husi nivel munisípiu ne’e hatudu kompromisu hamutuk entre autoridade saúde lokal ho INSPTL atu kontinua hametin sistema saúde no servisu imunizasaun ba povu.

Formasaun ne’e halao durante loron 5 hahu husi loron 11 – 15 Maio 2026, ba professional saude sira hamutuk nain 41 ho komposisaun mane nain 6 no Feto nain 35 ho klasifikasaun hanesan Mediku, Parteira no Enfermeiro-a ne’ebé halao kna’ar iha sentro saude komunitaria, Manatuto Vila, Laclubar, Laleia, Soibada no Laclo nomos Postu suade sira inklui mos Servicos Saude Municipal Manatuto ho nia komposisaun hanesan tuir mai, Mediku nain 1, Parteira nain 18 no Enfermeiru-a nain 28.

Formadores sira mai husi INSP-TL, Ministeriu da saude, UNICEF no Organizasaun Mundial Saude ( OMS), formasaun ne’e realiza tamba servisu hamutuk entre INSP-TL ho WHO, UNICEF no Servicos Sentrais Ministeriu da saude ho apoiu financiamentu husi GAVI liu husi OMS.

Iha remata atividade ne’e, representante formandu sira Sr. Manuel Soares Quintão sira hato’o apresiasaun ba INSPTL no ekipa formadores sira, no reafirma sira nia prontidaun atu implementa koñesimentu ne’ebé aprende ona iha fatin servisu ida-idak, iha sorin seluk mos husu atu formasaun sira ne’e labele para deit iha ne’e maibe presisa habelar no kontinua nafatin atu bele fo kapasitasaun ba profesionais saude sira atu nune’e bele fo prestasaun diak ho kulidade ba komunidade iha area saude.

“Hametin Rekursu Umanu, Hasa’e Kualidade Servisu Saúde, Proteje Futuru Nasaun.”