INSP-TL

Embaixador japaun ba Timor-Leste S.E. Mr. Yasushi YAMAMOTO hala’o visita oficial ba Institutu Nasional Saúde Públika Timor-Leste (INSP-TL), iha loron kuarta-feira, 13 Maiu 2026. Objetivu hosi visita ne’e atu observa diretamente prosesu formasaun Ultrasonografia (USG) ba profissional saúde sira hosi Munisípiu Bobonaro ne’ebé atualmente realiza hela iha INSP-TL ho apoiu hosi parseiru Frontline.⁠

Iha visita ne’e, Sr. Embaixador simu hosi Diretor Unidade Jestaun Parseria Sr. Ivo Ireneu da Conceicao Freitas no akompanha husi Diretor Nasional Formasaun INSP-TL Sr. Amelito Gomes, S.KeP., Ners. iha visita ne'e Ekipa INSP-TL liu husi Formador sira aprezenta objetivu formasaun, prosesu aprendizajen no importánsia utilizasaun ekipamentu USG atu suporta melhoria servisu saúde inan no labarik iha nível fasilidade Saude iha municipiu Bobonaro.

Durante observasaun, Sr. Embaixador haree diretamente atividade prática no partisipasaun ativa hosi formandu sira durante prosesu formasaun. Parseiru Frontline mos kontinua fó apoiu tékniku no fasilidade hodi asegura kapasidade profissional saúde sira aumenta no bele implementa servisu USG ho efetivu iha fatin servisu ida-idak.

INSP-TL agradese ba apoiu no kooperasaun hosi Governu Japaun no parseiru Frontline ne’ebé durante ne’e kontribui ba dezenvolvimentu rekursu umanu saúde iha Timor-Leste, liuliu iha área saúde inan no labarik.