INSP-TL

Viqueque, INSP-TL, 25 Maiu 2026, Institutu Nasional Saúde Públika Timor-Leste (INSP-TL), liu hosi Diresaun Nasional Formasaun faselita formasaun Imunizasaun Iha Prátika (IIP) ba pessoal saúde kompostu hosi Parteira, Enfermeiro/a no Médico durante loron lima iha Munisipiu Viqueque, Salaun Luminar Restorante Viqueque Villa.

Objetivu iha formasaun ne’e maka : Hasa’e koñesimentu no kapasidade profesional saude sira kona-ba programa imunizasaun; hakbiit abilidade pratika iha preparasaun, armazenamentu no administrasaun vaksina ho loos no seguru; Garante implementasaun imunizasaun tuir padraun no prosedimentu nasional; Hasa’e kapasidade monitorizasaun, rejistu no relatóriu dados imunizasaun; no parte importante ida maka suporta esforsu governu hodi aumenta cobertura imunizasaun no prevene moras ne’ebé bele prevene ho vaksina.

Diretor Nasional Formasaun INSPTL Sr. Amelito Gomes, oficialmente loke formasaun pratika imunizasaun ba profesional saúde sira husi Munisípiu Viqueque. Formasaun ne’e realiza hodi hasa’e koñesimentu no kapasidade profesional saúde sira iha área imunizasaun, atu bele fó servisu ne’ebé di’ak liu ba komunidade.

Iha nia intervensaun, Diretor Nasional Formasaun mos hato’o katak imunizasaun nu’udar programa importante tebes iha setor saúde tanba bele prevene moras sira ne’ebé bele ameasa vida labarik no komunidade. Nia husu ba partisípante sira atu tuir formasaun ne’e ho seriedade no aplika koñesimentu ne’ebé hetan iha fatin servisu ida-idak. Iha intervensaun ne’e director Nasional Formasaun mos akresenta katak partisipasaun ativa durante formasaun maka sai fator susesu durante formasaun hodi nune’e bele aplika fali kuinesimentu iha fasilidade saude nebe ita boot sira hakna’ar-an ho professionalismo no kualidade as ba komunidade sira.

Iha nia intervensaun abertura, Diretor Nasional Formasaun mos hato’o agradese ba Gavi ne’ebé apoiu fundus liu husi World Health Organization, nomos apoiu tekniku husi World Health Organization, UNICEF no unidade Vaccine Preventable Diseases husi Ministeriu Saúde nomos ba Formadores sira nebe sempre pronto fahe sira nia kuinesimentu ba profesionais saude sira durante formasaun ne’e.

Iha seremonia abertura ne’e partisipa mos Diretor Saúde Munisípiu Viqueque, Representante UNCEF Sr. Caitano Gusmão no OMS Sr. Mateus Cunha nomos Diretor Unidade Jestaun Parseria no pessoal tekniku programa husi Servisu Saude Municipal Municipiu Viqueque. Iha intervensaun katak formasaun ne’e importante tebes ba profesionais saude sira nune’e mos director agradese ba INSPTL tanba organiza formasaun importante ida ne’e ba profesional saúde sira iha munisípiu refere. Nia hato’o katak formasaun imunizasaun hanesan oportunidade ida atu hasa’e kapasidade no koñesimentu profesional saúde sira, nune’e bele melhora servisu imunizasaun no saúde iha fasilidade saude hanesan sentru saude Komunitaria no Postu saude sira iha municipiu Viqueque.nune’e husu ba formandu sira atu partisipa ativa durante iha formasaun ne’e hodi hetan kuinesimentu tekniku diak liu tan.

Formasaun ne’e sei hala’o durante loron 5 no partisipa husi profesional saúde sira hanesan mediku, enfermeiru no parteira sira husi Sentru Saúde Komunitária hotu iha Munisípiu Viqueque no mos postu saúde sira ho total formandu hamutuk nain 44 ho komposisaun hanesan : mediku hamutuk nain 2, Enfermeiru-a hamutuk nain 26 no parterira hamutuk nain 16 Durante formasaun, partisípante sira sei simu matéria teórika no pratika direta kona-ba prosedimentu imunizasaun, jestaun vacina, no medida seguransa atu garante servisu imunizasaun ne’ebé efetivu no seguru ba komunidade.

Formasaun ne’e realiza tamba servisu hamutuk entre INSPTL ho parseiru World Health Organization no apoiu fundus husi Gavi, no apoiu tékniku husi UNICEF no Unidade Vaccine Preventable Deaseas, (VPD) Departamentu Vigilansia Epidemiologia-Ministério da Saúde.

Atividade ne’e hanesan parte husi esforsu hodi kontinua hametin kapasidade rekursu umanu saúde no melhora programa imunizasaun iha Timor-Leste.