INSP-TL

Iha sede Organizasaun Mundial Saúde iha Geneva, Switzerland, 25 de Maio 2026, Presidente Instituto Nacional de Saúde Pública de Timor-Leste (INSP-TL), Dr. Nevio Sarmento, reprezenta Ministériu Saúde (MdS) no INSP-TL iha Reunian Global Diagnostics Coalition, ne’ebé nia hato’o keynote speech kona-ba progresu Timor-Leste nian dezemvolve Lista Essensial Diagnostiku Timor-Leste ka NEDL liu-liu iha parte fortalesimentu sistema laboratóriu no diagnóstiku nasional.

Iha nia apresentasaun, Prezidente hanesan mos autor prinsipal ba NEDL fahe experiénsia Timor-Leste nian nu’udar nasaun dahuluk iha rejiaun ASEAN ne’ebé konsege dezenvolve no iha faze implementaun ona National Essential Diagnostics List (NEDL) refere. Nia hateten katak NEDL sai ona hanesan matadalan importante ida atu hadi’a asesu ba serviços diagnóstiku essensiál no hametin sistema laboratóriu iha nasaun laran.

Timor-Leste konsege ona integra NEDL ba planu estrategia nasional laboratóriu, planu aprovisionamento laboratóriu, no mos uza hodi atualiza kustu/presu no alokasaun rekursu sira. Abordajen ida-ne’e asegura katak investimentu laboratoriais alinha ho prioridade saúde nasional, pezu moras, no nesesidade servisu saúde nian.

Presidente mos aprezenta katak NEDL la’ós deit dokumentu tékniku ida, maibé mos estrutura estratéjika ida ne’ebé suporta asesu igual ba diagnóstikus ho kualidade no hametin planeamentu no efisiénsia iha sistema saúde.

Partisipantes husi organizasaun internasionál, parseiru dezenvolvimentu, no membru-estadu sira apresia tebes progresu Timor-Leste nian, liu-liu kapasidade nasaun ida-ne’e atu transforma rekomendasaun globál kona-ba laboratóriu no diagnóstiku ba implementasaun prátika iha nível nasional maski iha limitasaun rekursu.

Reuniaun Global Diagnostics Coalition mos sai plataforma importante ida ba Timor-Leste atu fahe experiénsia, hametin kolaborasaun internasionál, no advoka investimentu boot liutan ba diagnóstiku no sistema laboratóriu hanesan parte importante husi kobertura saúde universal no seguransa saúde global.

Liuhusi lideransa Ministériu Saúde no Instituto Nacional de Saúde Pública de Timor-Leste, Timor-Leste kontinua avansa inisiativa fortalesimentu laboratóriu atu hadi’a detesaun moras, vijilansia, preparasaun no responde ba surtu sira