INSP-TL

INSP-TL, 08 Juñu 2026. Instituto Nacional Saúde Pública Timor-Leste (INSP-TL) realiza oficialmente abertura ba Formasaun Kuidadu Saúde Komunitária ne'ebé fasilita husi ekipa peritu sira husi Argentina. Serimónia abertura ne'e hetan honra ho partisipasaun husi Sua Excelénsia Presidente República Democrática de Timor-Leste, Dr. José Ramos-Horta, Sua Excelénsia Ministra Saúde, dr. Élia dos Reis Amaral, SH, Vice Embaixador Argentina ba Indonézia no Timor-Leste, Dr. Juan Ignacio Lacunza, Prezidente Konsellu Diretivu INSP-TL, Dr. Nevio Sarmento, Diretor-Geral, Diretores Nasionais husi Ministériu Saúde no INSP-TL, peritu sira husi Argentina, formandu sira husi munisípiu hotu-hotu no nasional, reprezentante média no funsionáriu INSP-TL.

Iha nia diskursu abertura, Prezidente Konsellu Diretivu INSP-TL, Dr. Nevio Sarmento, hato'o nia apresiasaun boot ba Governu Argentina no ekipa peritu sira ne'ebé mai Timor-Leste atu fahe sira-nia koñesimentu, esperiénsia no boas práticas iha área saúde públika no kuidadu saúde komunitária. Nia enfatiza katak kooperasaun entre Timor-Leste no Argentina iha setor saúde kontribui diretamente ba fortalecimentu kapasidade rekursu umanu saúde no melhoria servisu saúde ba komunidade.

Iha nia intervensaun, Vice Embaixador Argentina ba Indonézia no Timor-Leste, Dr. Juan Ignacio Lacunza, hato'o katak Governu Argentina sente orgullu no haksolok atu apoia dezenvolvimentu setor saúde iha Timor-Leste liuhosi programa formasaun no transferénsia koñesimentu. Nia reafirma kompromisu Argentina atu kontinua hametin relasaun bilateral ho Timor-Leste, liu-liu iha área saúde públika, kuidadu saúde primária no dezenvolvimentu profesional saúde.

Sua Excelénsia Ministra Saúde, dr. Élia dos Reis Amaral, SH, iha nia mensajen, hateten katak formasaun ida-ne'e importante tebes atu hasa'e kompeténsia no kapasidade profesional saúde sira iha vários domíniu estratéjiku, inklui kuidadu kliniku, métodu diagnóstiku, saúde públika, epidemiolojia, lideransa no gestaun saúde. Nia enfatiza katak investimentu iha kapasitasaun rekursu umanu mak fundamentál atu garante servisu saúde ne'ebé ho kualidade, efisiente no asesível ba populasaun tomak.

Iha nia intervista espesial, Sua Excelénsia Presidente RDTL, Dr. José Ramos-Horta, hato'o apresiasaun aas ba iniciativa ne'e no ba kontribuisaun Governu Argentina iha apoiu dezenvolvimentu setor saúde iha Timor-Leste. Nia subliña katak edukasaun no formasaun contínua ba profesional saúde sira mak xave importante atu responde ba dezafiu saúde públika no atu asegura katak sidadaun sira hetan atendimentu saúde ne'ebé di'ak no seguru. Nia encoraja partisipante sira atu aproveita oportunidade ne'e hodi aprende no aplika koñesimentu foun sira iha sira-nia fatin servisu.

Formasaun ne'e envolve partisipante sira husi munisípiu hotu-hotu no foka ba fortalecimentu kapasidade profissional saúde iha área kuidadu saúde komunitária, prevenção no kontrolu moras, epidemiolojia, lideransa no gestaun servisu saúde. Espera katak liuhosi atividade ne'e, profesional saúde sira bele aumenta sira-nia koñesimentu no habilidade prátika hodi kontribui ba melhoria saúde komunidade iha Timor-Leste.

Serimónia abertura remata ho fotografia hamutuk entre autoridade sira, peritu internasionál no partisipante sira, hanesan símbolu ba hametin kooperasaun no amizade entre Timor-Leste no Argentina iha área saúde no dezenvolvimentu rekursu umanu.