INSP-TL

Lideransa Institutu Nasional Saude Públika Timor-Leste (INSP-TL) hala’o enkontru atu rona no avalia apresentasaun Módulu Kuidadu Emergencia ne’ebé dezenvolve husi Direção Nasional Formasaun. Sesaun ida ne’e marka pasu importante ida ba reforsu kapasidade formasaun iha área atendimentu emerjénsia iha Timor-Leste.

Iha nia lia-fuan abertura, Exelentisimo Prezidente INSP-TL, Dr. Nevio da Costa Sarmento, hatete katak dezenvolvimentu Módulu Kuidadu Emergencia reflete progresu signifikativu husi Direção Nasional Formasaun iha lideransa Diretor Nasional Treinamentu, Gregorio Rangel, M.Sc. Nia hateten katak rezultadu ida ne’e hatudu kompromisu forte institusaun nian atu hadi’a kualidade formasaun baforsa traballu saúde iha ita rai.

Iha nia kapasidade hanesan Prezidente Konsellu Diretivu INSP-TL, nia mos simu ho laran luan ba formadór sira no médiku espesialista sira ne’ebé servisu ho dedikasaun atu dezenvolve módulu ne’e, ho apoiu importante husi Association Maluk Timor (AMT). Nia hatudu apresiasaun ba kolaborasaun forte ne’ebé lori to’o rezultadu ida ne’e.

Módulu Emergency Care ne’e apresente husi Francisco Borges iha Sala Konferénsia INSP-TL. Hafoin apresentasaun, hala’o diskusaun konstrutivu ida ne’ebé Diretor sira no partisipante sira fó sira-nia opiniaun, rekomendasaun no sugestaun tékniku atu hadi’a liután módulu ne’e.

Diretor Unidade Parceria INSP-TL, Ivo Ireneu, Lic. Sp., hatete katak módulu ne’e dezenvolve di’ak ona, maibé rekomenda atu tau atensaun liután ba dizenu kapa, organizasaun kontéudu no rekoinese kontribuidór sira ne’ebé partisipa ativu iha dezenvolvimentu módulu.

Diretora Ezekutiva AMT, Dillyana Ximenes, hatudu nia apresiasaun boot ba ekipa forte entre INSP-TL no AMT ne’ebé bele alkansa pasu ida ne’e. Nia hein katak ekipa sei kontinua simu no integra tan rekomendasaun no input sira atu hadi’a liután dokumentu ne’e.

Iha nia intervensaun, Diretor Nasional Formasaun INSP-TL, Gregorio Rangel, M.Sc., agradese ba partisipante hotu ba sira-nia sugestaun no rekomendasaun valiozu. Nia afirma fila-fali katak ekipa Direção Nasional Formasaun sei reve ho kuidadu input hotu no hadiak módulu Emergency Care bazeia ba informasaun ne’ebé simu.

Enkontru ne’e partisipa husi Prezidente INSP-TL, Diretor Nasional no Unidade sira INSP-TL, Diretora Ezekutiva AMT ho nia ekipa, treinadór sira no ekipa tékniku sira husi INSP-TL.