INSP-TL

Enserramentu Formasaun ba Formador sira realiza iha Salaun Enkontru INSP-TL, hafoin atividade formasaun ne’ebé hala’o durante loron nen nia laran, hahu husi loron 13 to’o 24 Marsu 2026. Formasaun ida ne’e ho objetivu atu hadia kapasidade formador sira nian hodi suporta dezenvolvimentu rekursu umanu iha setor saude.

Iha intervensaun, reprezentante husi Asosiasaun Maluk Timor (AMT), Sr. Belmiro, hato’o agradese ba INSP-TL hanesan parseiru dezenvolvimentu ne’ebé fo oportunidade ba AMT atu partisipa iha atividade importante ida ne’e. Nia mos enfatiza katak kolaborasaun entre instituisaun sira importante tebes atu hasa’e kapasidade profissional sira iha Timor-Leste.

Iha parte seluk, Diretor Geral Tekniku no Sientifiku INSP-TL, Gregorio Rangel, M.Sc., hato’o katak susesu formasaun ida ne’e mak rezultadu husi esforsu kolektivu entre ekipa organizador, gerente, no formador sira. Nia mos hatete katak husi total formador 24 ne’ebé partisipa, barak liu mai husi INSP-TL, AMT, no SNAEM, ne’ebé hatudu kolaborasaun institusional ne’ebé forte.

Aleinde ne’e, Diretor Geral ne’e mos salienta katak formador sira iha papel importante atu kontinua kontribui iha prosesu fasilitasaun iha futuru, liu-liu servisu hamutuk ho formador senior sira. Nia husu ba partisipante sira atu aplika konesimentu no abilidade ne’ebé hetan durante formasaun hodi suporta dezenvolvimentu setor saude, liu-liu iha area kapasidade profissional ba traballador saude sira iha nivel oin-oin. Iha momentu ne mos distribui sertifikadu ba formandu sira hotu.

Enserramentu remata ho esperansa katak formasaun ida ne’e bele kontribui ba hadia kualidade servisu saude iha Timor-Leste liu husi formador sira ne’ebé kompetente no prontu atu halo mudansa.