INSP-TL

Presidente Institutu Nasional Saúde Públika Timor-Leste, Dr. Nevio da Costa Sarmento hala’o abertura ba Workshop konsultasaun públiku final esbosu Quality Framework (QAF) ba UGQ no estratéjia formasaun (Training Strategy/TS) ba DNF ne’ebé maka hetan apoiu hosi PHD no aprezentasaun ba pakote formasaun INSP-TL ne’ebé hetan apoiu hosi parseiru Dezenvolvimentu Assosiasaun Maluk Timor, iha Timor Plaza, Orchid Room.

Iha abertura presidente INSP-TL hateten, Sente onradu tebes ba workshop ida ne’e, tanba ohin bele deskute ona esbosu ba diskusaun final ne’ebé foka liu ba iha Quality Framework no estratéjia formasaun. Iha tinan hirak liu ba ita hala’o onaprograma ne’e, ho ne’e loron ohin hanesan hala’o diskusaun atu bele halo aprovasaun hodi haree no haforsa liutan servisu garantia kualidade nu’udar padraun ba servisu ne’ebé sai hanesan matadalan ba iha formasaun.

Iha sorin seluk Diretora Ezekutiva Parseiru Dezenvolvimentu Assosiasaun Maluk Timor Sra. Diliyana Ximenes, iha deskursu informa, programa dijitalizasaun pakote formasaun integradu kuidadu saúde primaria hetan fundus hosi Governu Australia liu hosi PHD no servisu hamutuk ho INSP-TL komesa iha fulan abril tinan rua liu ba to’o iha fulan ida ne’e, konsidera katak programa ne’e formalmente to’o ona ninia finalidade.

Diretora mós akresenta tan katak, programa ida ne’e laos projetu maibé programa ne’e konsidera hanesan programa boot presiza tinan barak hodi bele atinje albu no asegura sustentabilidade.

Workshop ne’e realiza tanba servisu hamutuk entre INSP-TL ho parseiru Dezenvolvimentu Assosiasaun Maluk Timor no “Partnership for Human Development (PHD)”.

Workshop ne’e partisipa hosi Konsellu Diretivu INSP-TL ne’ebé lidera hosi Prezidente INSP-TL, Diretores Jerais, Diretores Nasionais, Diretores Unidades, reprezentante DFAT, parseiru Dezenvolvimentu sira ne’ebé hetan fundus hosi DFAT ou Governu Australia no formadores INSP-TL.