INSP-TL

Institutu Nasionál Saúde Públika Timor-Leste (INSP-TL) halao vizita kortezia ba World Health Organization Country Office iha Dili iha loron 30 Marsu 2026. Objetivu husi vizita ne’e mak atu hametin kolaborasaun ne’ebé iha ona no esplora oportunidade sira ba koperasaun futuru entre INSP-TL no WHO Timor-Leste iha área formasaun, peskiza, saúde públika no servisu laboratóriu.

Delegasaun INSP-TL lidera husi Prezidenti Konsellu Diretivu, Dr. Nevio da Costa Sarmento, no inklui Diretór Jerál Laboratóriu, Mr. Mario da Costa, Lic. SP no Diretór Jerál ba Asuntu Tékniku no Sientífiku, Mr. Gregorio Rangel, M.Sc.

Durante sesaun abertura, Reprezentante WHO iha Timor-Leste, Dr. Arvind Matur, hatudu nia apresiasaun ba vizita ne’e no reafirma WHO nia kompromisu atu suporta INSP-TL. Nia mos sublinha kolaborasaun di’ak entre instituisaun rua ne’e iha esforsu atu hametin kapasidade saúde públika no harii forsa traballu nasionál ne’ebé kualifikadu.

Realizasaun importante ida iha tinan 2025 mak graduasaun kohorte dahuluk epidemiologia terenu (frontline) liuhosi Frontline Epidemiology Training Program (FETP), ne’ebé agora hetan ona apoiu husi alokasaun orsamentu husi INSP-TL no kontribui diretamente iha setor saúde públika. Ho apoiu husi Korea International Cooperation Agency, koperasaun ida ne’e mos loke oportunidade ba formasaun espesializadu. Entre sira ne’e, iha ema na’in 4 husi FETP avançadu ne’ebé agora hela aprende programa mestradu iha Gadjah Mada University iha Indonézia, funsionáriu Laboratóriu Saúde Nasionál na’in 12 simu formasaun iha Mahidol University iha Tailándia, no profisionál laboratóriu sénior na’in 12 remata ona formasaun lideransa no jestaun iha Koreia do Sul.

Iha nia intervensaun, Dr. Nevio da Costa Sarmento hateten katak INSP-TL, hanesan instituisaun foun ida iha Ministériu Saúde nia okos, hetan mandatu husi Governu Timor-Leste atu lidera peskiza, formasaun, vijilánsia no servisu referénsia laboratóriu nasionál. Nia mos agradese ba WHO Country Office tanba fasilita enkontru ida ne’e no reafirma fali INSP-TL nia vizasaun atu sai hanesan sentru ekselénsia ba formasaun, peskiza, servisu laboratóriu no sistema vijilánsia iha futuru.

Enkontru ne’e remata ho diskusaun produtivu entre Diretór Jerál sira husi INSP-TL no tékniku espesialista sira husi WHO kona-ba oinsá atu hametin kolaborasaun ne’ebé iha ona no identifika oportunidade foun sira atu dezenvolve liután área formasaun, peskiza, sistema laboratóriu no kapasidade vijilánsia iha Timor-Leste