INSP-TL

 Enkontru Konselu Diretivu ho Diretor Geral sira iha INSP-TL realiza ho objetivu atu diskute no define prioridade servisu estratéjiku sira ne’ebé sei orienta dezenvolvimentu institusionál iha tinan 2026 no tuir mai.

Iha sesaun abertura, Prezidenti Konselu Diretivu INSP-TL, Dr. Nevio da Costa Sarmento, hato’o katak enkontru ida ne’e importante tebes tanba fó oportunidade ba Konselu Diretivu no Diretor Geral sira atu troka hanoin no harmoniza vizaun kona-ba diresaun estratéjika instituisaun nian. Nia mos sublinha katak INSP-TL iha papel sentrál iha fortalesimentu sistema saúde públika iha Timor-Leste liu husi formasaun rekursu umanu, peskiza siéntifika, no servisu laboratoriu ne’ebé iha kualidade.

Durante diskusaun, partisipante sira analiza situasaun atual, identifika desafio prinsipal sira no oportunidade sira atu hadi’a servisu iha área prinsipal sira hanesan:

Formasaun: reforsa kapasidade rekursu umanu liu husi programa treinamentu kontínuu, inklui Field Epidemiology Training Program (FETP) no programa espesializadu seluk;

Peskiza: promove peskiza aplikadu ne’ebé responde ba nesesidade nasionál, ho énfase ba evidénsia hodi suporta desizaun polítika saúde;

Saúde Públika: reforsa sistema vigilánsia epidemiolójika, detesaun lalais ba surtus no resposta efetiva;

Laboratoriu: asegura padraun kualidade no akreditasaun laboratoriu sira hodi suporta diagnóstiku presizu no konfiável.

Iha remate diskusaun, Konselu Diretivu no Diretor Geral sira konkorda atu halo identifikasaun detallu kona-ba área prioridade sira no inisia implementasaun servisu estratéjiku sira ho planu asaun klaru, inklui indikadór monitorizasaun no avaliasaun.

Enkontru ne’e mos hamosu kompromisu hamutuk atu reforsa koordenasaun entre Diresaun Nasional sira iha INSP-TL, atu garante efisiénsia no impaktu máximu ba servisu saúde públika iha Timor-Leste. Konselu Diretivu mos enfatiza importánsia kolaborasaun ho parseiru nasionál no internasionál sira atu suporta implementasaun programa estratéjiku sira.

Ho enkontru ida ne’e, INSP-TL reafirma nia kompromisu atu sai hanesan instituisaun nebe lidera iha área saúde públika, peskiza, formasaun no laboratoriu, atu kontribui ba hadia saúde povu Timor-Leste. Marka iha enkontru ne mak hanesan president konselu Diretivu Dr. Nevio Sarmento, primeiru vogal dr. Gustodio, segundo vogal Endang da Silva, Diretor Geral Administrasaun, Tomasia Sousa, SKM, Diretor Geral Tekniku Sientifiku, Gregorio Rangel, M.Sc. No ekipa tekniku INSP-TL.