INSP-TL

 Diretor Geral Tékniku Sientífiku INSP-TL, Gregorio Rangel, M.Sc., sai hanesan oradór hodi ko’alia kona-ba papel no funsaun INSP-TL ba funsionáriu foun sira ne’ebé rekruta husi Ministériu da Saúde, molok distribui sira ba fasilidade saúde iha nivel nasionál, munisipiu no postu administrativu sira.

Iha ninia intervensaun, Diretor Geral hatete katak papel importante INSP-TL nian mak bazeia ba área prinsipál haat (4), tuir Dekretu-Lei Nú. 84/2022, loron 23 Novembru, mak hanesan: formasaun, peskiza, saúde públika no referénsia laboratoriu. Nia mos husu ba funsionáriu foun sira atu hala’o servisu tuir termu referénsia ne’ebé lideransa sira estabelese no kumpri orientasaun sira ne’ebé jerente sira fó, atu garante servisu saúde ne’ebé di’ak no efisiente.

Nia hatutan tan katak Ministériu da Saúde deposita konfiansa boot ba funsionáriu foun sira hodi fó atendimentu di’ak ba populasaun, liu-liu ba inan, aman no família sira iha fatin servisu ida-idak.

Iha parte seluk, Diretor Geral esplika katak servisu INSP-TL sira interligadu malu, inklui formasaun, peskiza, saúde públika no referénsia laboratoriu, ne’ebé presiza hetan akompanhamentu husi unidade kontrolu kualidade atu asegura implementasaun atividade sira tuir padraun ne’ebé estabelese, liu-liu iha área formasaun.

Kona-ba peskiza, nia hatete katak presiza halo akompanhamentu rigorozu atu garante implementasaun peskiza tuir proposta ne’ebé aprova ona. Iha área vigilánsia epidemiolojia, INSP-TL hala’o knaar importante hodi responde ba surtu moras sira iha Timor-Leste, liu-liu ho investigasaun, análize profunda no fornese rekomendasaun ba Ministériu da Saúde atu foti medida urjente.

Iha sorin seluk, referénsia laboratoriu, INSP-TL mos fó atendimentu ba amostra kliniku sira ne’ebé refere husi nivel munisipiu ba nivel nasionál, hodi halo deteksaun no fó rezultadu ne’ebé sai baze importante ba tratamentu saúde.

Aprezentasaun remata ho sesaun pergunta no resposta entre oradór no partisipante sira, ne’ebé permite diskusaun interativu no klarifikasaun kona-ba asuntu sira ne’ebé aprezenta.